لاتشرحلي
لا تشرحلي انه الجذاب ما فهمة
انتهت و وركابنه بيناتهن ذمة
**********
ما دامك تسولف بلصداقه وياي
من اضحك لاتكلي علضحك زحمة
**********
تره من اضحكت مو يعني كلبي بخير
مرات الخلك تضحك من الصدمة
**********
ومرات الدمع مايلكه فرصه يطيح
ترة الفشلان بجيه شفاف مبتسمه
**********
اذا متحبني ليش من اصدقائي تغار
مكابلني من الشمس للنجمة
**********
ودقق بلبسي وعطري المخليه
واجيت بيادرب ياهو الجنت يمه ؟
**********
ويضكل وجهك من اذكر حبيبي الراح
ومن اسرح بعينك تنكلب نسمه
**********
اصدك هذا مو حب وعترف غلطان
من تلكالي واحد يغلط باسمة
**********
انهي البينه بس مو بهيج اعذار
هسج الجاي هنته الرايح احترمة
**********
جاي تكلي صعبه نخلي ايد بيد
وانه مرات صدري لصدرك اتضمة
**********
هو الرايدك يعرف ضرف وسباب
بس كله اكو ثاني بحبك محشمة
**********
الحب كل ما صعبه يغلى عليحبون
ترة يضحك علينه اليحجي بلقسمه
**********
الميصبه انت حلو وتمطر علي بوسات
ووانه كالتلي امي علمطر رحمة
**********
لاخصبن على القداح يهوى الشم
وانه مو من فراغ وياك كمت احلم
بعيونك المفضوحه تريد احتار
وانه مفسر شمكتوب بلطلسم
**********
اجيت مواعد الوردة ام نوايه البيض
على يا اساس ارد ثيابي تنكط دم
**********
وما يحتاج اكلك بقه بي ثلمه
وعلى وضعي بعد لاتاخذك همه
الكلب جوه الضلوع ويلمح مكسور
دكافي الفطن لجماته بحجي الغشمه
**********
عندك ثقه بكلبي وهل بقيت تروح
اليدري بروحه غالي البعد ميهمه
**********
اذا عندك وكت ساعدني علنسيان
وبلكت تفهم الماكاعد افتهمة
**********
اريد الزم جروحي وين امد الايد
يلزم يامكان الجارحه بكلمة
**********
ومن اشتاكلك بعد ثنعش بليل
وتبدي العاطفه تضحك على الحكمه
**********
شدير لعيني غير سوالفك وتنام
بشنو يكابل الليل الولفه مو يمة
**********
ارد اقرة الرسايل خاف ما رديت
وصلت المرحله مكتوبك اشتمة
**********
وخاف اطفي الضوه وحشة الليل تزيد
وضل وحدي وصورك علي ملتمه
**********
جنت جاهل واخاف الظلمة عذري وياي
هسة شطولني وخايف من الظلمة
**********
كل شي ولا تصدك شي طبيعي انساك
حرب نسيانك انت وسيفي بيه اعمة
**********
وكلت انساك بس مشكلة اليحب حيل
كل شي يكول لمن يحترك دمة
**********
المهم غوركت عيني وناسي منتضرين
شماته وناطرة دموع الخير حلمة
**********
يهنيال الطفل بلعبرة مايحتار
يلم ادموعه ويذبهه بحن امة
**********
وضحت غايتك بس كلبي مدري شبيه
يمدحك ونته نيتك بلهوة تذمة
**********
عاشت ايدك وما خابت ضنونك
سويت التريده وذب بعيونك
**********
اليحس بلوحده غير لوحده جاي يعيش
انه بلهوسه احس بلوحده من دونك
**********
عشنه بحلم اني الماشي بيه جناز
ونت الهاشمي يبرج على متونك
**********
بس بحضك وبختك شكو لجمة
يلمتعافي يلماتعرف النعمة
عساك بواحد يعيشك مرارة وياه
وشما كتله كافي يرفع خشمهة
**********
شكد بيه عتب بس ادري راح تروح
ولو يرتاح كلمن سولف بهمة
**********
ردنه نصير واحد بس بقينه ثنين
انتهه البيناتنه وكلمن مشه بحلمه
**********
للشاعر رائد ابو فتيان
ليست هناك تعليقات:
إرسال تعليق